Основачот на Фејсбук Марк Закерберг вели дека оваа социјална мрежа ја создал со идеја да го направи светот повеќе отворен и повеќе поврзан. Денес интернетот и социјалните мрежи навистина ни помагаат да се запознаеме и да бидеме во контакт со корисници од сите страни на светот. 

Во овој нов поврзан и вмрежен свет покрај многубројните позитивни страни, се кријат и многу предизвици. Еден од нив е тестирањето на нашето разбирање и толеранција на различните култури и вредности што ги поседуваат другите корисници со кои комуницираме. Некои навики и практики што се прифатени во нашата култура се сметаат за погрешни, или се забранети во некоја друга култура. Различната историја, традиција, идеологија, религија или други вредности создаваат различни општества и супкултури.

Кон различностите во новиот вмрежен свет треба да пристапуваме со разбирање и толеранција, да не ги сметаме за директна опасност, туку за разноликости што придонесуваат кон богатството на човековата цивилизација. Секоја група или поединец имаат право да го изберат својот идентитет и начин на живеење, без притоа да ги загрозуваат или да ги напаѓаат другите групи и култури.